Your Daily News

Kohhran pawl hrang hrangte lo chhuah dan

0 228

Khawvela kohhran hrang hrangte chanchin tlangpui leh an nihphung leh zeizia te, beng tivartu atan kan lo sawi ang a. Rawngbawltute tan thil hriat tul tak pawh a ni ve reng reng a, amaherawhchu a tlangpui pawimawh zual chauh a ni ang.

Kohhran hmasate leh Kohhran sang an tihho te: Apostol ho hun lai AD 100 hma lam kha chuan vawiin nia Catholic, Presbyterian, Salvation Army, Baptist etc. tih ang chi pawl hrang hming hi a la awm lo. Hmun hrang hrang leh khaw hrang hranga Kohhrante kha Kohhran hrang an ni mai a, Makedonia rama Kohhran (II Kor. 8:1), Jerusalem khuaa Kohhran (TT. 11:22), Antiokei khuaa Kohhran (TT. 13:1) etc. tia koh an ni mai thin.

Kum zabi 2-naah pawh khan Kristiante chu nekchepna leh tuarna hlirin an khat tih mai tur a la ni. Kum zabi 3-naah chuan boruak danglamin a lo chim ta a. Emperor Constantin-a, Kristian lal hmasa ber a lo nih khan Kristian sakhua chu sorkar sakhuaah a puang a, chuta tang chuan Kristiante chu an zalenin an lo râlmuang ta a ni.

Heta tang hian Rom sorkar ropui tak mai leh Kristianna chu rei lo teah a lo ropui ta em em a, Bishop dinhmun an lo siam chhuak ta a ni. Chu chu Tirhkoh hote (Apostol hote) aiawhtu anga ngaih a ni ta bawk. Hun a lo kal zel a, kum zabi 4-na leh 5-naah chuan Kohhran chuan hmunpui lian bik 5 a nei tas. Chungte chu – Jerusalem te, Antiokei te, Alexandria te, Constantinople leh Rome te a ni. Heng khawpui 5-a Kohhran hotu ber Bishop-te chu an indah sang bik hle a, ‘Metropolitant’ an inti a, chu chu Khawpui Bishop tihna a ni. Chutichuan, khawchhak lam Constantinople Bishop chu a din ngheh chhoh zel laiin khawthlang lamah erawh Bishop hming chu a dai tial tial thung. Rome chu sorkar hmunpui ber a nih bawk avangin Rome Bishop chu a indah sang em em bik zel a, rei vak lovah Rome Bishop chu PA BER (Pope) an lo ti ta mai a ni.

Hetih lai hian khawthlang lamah chuan Khawpui Bishop hote pawhin Pope an inti ve zel tho bawk. Mahse, rei vak lovah Rome Pope Leo Ropuia chuan Tirhkoh Petera dinhmun luahtua inngaiin thu a puang ta a. Kum 500 AD-ah chuan Pope tih chuan Rome khawpuia Pope chauh a kawk tawh a ni. Chutiang chuan Pope thuneihna sang fawr tak chu a lo zichhuak ta. Chung lai atang chuan Roman Catholic tih hi a lo piang chhuak ta a, ‘Khawvel pum huapzo Rome Kohhran’ tihna a ni ber.

Rome Bishop Sylvester (314-335 AD) hun lai khan Europe khawthlang lam ram lalte chu Kohhran thu hnuaiah an intulut tan ta. Kum 500 AD-ah te kha chuan Europe pum deuh thaw Rome Pope hnuaiah a intulut tawh a ni. Charles Ropuia (742-814 AD) Emperor hun atang phei chuan Pope dinhmun chu sang fawr tak a lo ni ta a, Pathian aia hnuai, mihringte aia sang an ti hial.

Catholic-ho ten Pope indawt zel bul berah Petera an sawi thin hi a dik lova, Church Historical fact-ah a ni thei lo. Kum 500 AD vela PA BER hming invuaha thuneihna sang fawr tak (dictatorship) a lo zik chhuah tak atang khan a intan anga chhût chu a dik ber a ni. Chutichuan, Kohhran sang (High Church) vuah an lo ni ta.

Church History-ah chuan Khawchhak Kohhran an tih chuan Rome-a chin chhak lam, Turkey leh Russia ramte a huap a, Khawthlang Kohhran an tih chuan Rome-a chin thlang lam a huap thung. Khawchhak Kohhran tih chu Orthodox Kohhran sawina a ni a, Khawthlang Kohhran tih chuan Roman Catholic Kohhran sawina a ni. Chutichuan, khawchhak lamho an inla hrang ta a,1054 AD-ah inla hrangin Orthodox an inti ta a. Hei hi khawvel huapa Kohhran hrang hming piang hmasa ber a ni. Europe khawchhak Kristian tam ber chu Orthodox an lo ni ta a, anni pawh hi ‘High Church’-ah chhiar an ni.

500 AD tawp lamah khan Saint Augustine chu England ramah chanchintha meichher chhiin a lut a. Kristianna a phun a, vawiin thlenga England ram sorkar sakhua lo ni ta, Anglican (Church of England) Kohhran dintuah chhal a lo ni ta a ni. Anglican hi a kalhmang a danglam hle, amaha kal hrang tlatin, Rome Kohhran (Catholic) ah a intulut ngai lova, inkungkaihna tha tak a siam chauh a ni. Orthodox ho an inlak hran khan a zawm chuang hek lo. Europe ram tam tak – German, France, Scotland, Switzerland etc. ahte Church Reformation a lo chhuaha, indona rapthlak pui pui a chhuah pawh khan Anglican Kohhran leh England chu a râlbâng daih a. 1534 AD-a Reformation a thlen tirh lam khan Catholic nen an inkungkaihna a chhu chat a ni.

England ram Parliament rorelna sang zawk House of Lord member-ah englai pawhin, vawiin thleng hian Anglican kohhran Bishop 24 an tel ve ta zel a ni. Catholic leh Orthodox ang maia puithuna leh up taka inkaihruai an ni bawk. Nimahsela, thurin lamah chuan Siamthat Kohhranhote ang an ni daih si. Anglican hi England ram sorkar sakhua a nih avangin High Church an tih zingah chhiar a ni bawk. England ram lal ber King/Queen lallukhum khumtira la luttu chu Anglican kohhran hotu ber Archbishop of Canterbury apiang an ni a, Archbishop of Canterbury nemnghettu chu King/Queen apiang an ni thung. An kalphung hi a danglam hle a ni.

Heng Kohhran pathum – Roman Catholic, Orthodox leh Anglican te hi Kohhran hmasa leh hlun ber ber, khawvela Kohhran lian zual an ni a, High Churches tia vuah an ni.

Hun thim lai (Dark Age): Hmasang Kohhran chanchin kan thlir hian hun thim lai kha chhût tel a ngai tlat. Kohhran a kalsual thukzia te, chutih lai kara ringtu dik tak Krista neitute tuarna rapthlakte chuan a chim reng a. Tun hun atan chuan thil awih mai harsa tak pawh a ni ang, mahse, thudik a ni miau si. Hun thim lai han tih hian kum 500 vel lai chhung a awh a, kum 1000 – 1500 AD inkar kha a ni ber. 1000 AD hnu lawk khan Roman Kohhrana serh leh sang uarna kal zel chuan sacrament chi 7 ngawt an siam chhuah phah a ni.

Chutah Kohhran chuan sacrament, chhang leh uain chu Krista thisen tak takah a chang tih te, tui baptisma chu Evi leh Adama te sual tlenfai theihna a ni tihte an zirtir zel a. Hetiang rin dan hi ‘transubstantiation’ an ti. Chu bakah, mitthite thlarau, thlarau hrenna hmuna awm, leia an dam laia an sualte kangfai mek chu tawngtaisak a, chhan chhuah theih rin dante a lo piang zel bawk. Hei hi ‘purgatory’ an ti. Tin, mithianghlim, Apostol ho lim chibai bukna te, Isua nu Mari kaltlanga Pathian biaknate Kohhranah a lut ta zel bawk.

Hetiang hi mi tam takin duh lovin, nasa takin Kohhran chu an sawisel thin. Siamthatna ropui tak, 1500 bul lama a chhuah hma kum 100 zet atang tawh khan Kohhran tih dan leh a zirtirna duhtawk lovin harhtharna chang mi engemaw zatin an lo do thin a. Alps tlang vela Walden hote, England-ah Lollard hote, Bohemia ramah Huss hote, Albigen hote etc. tam tak an awm. Kohhran kal dan leh nunte hmu khawrovin, thlarau lama Pathian pawlna uar mi an lo chhuak zel a ni.

1000 AD tir lama Kristian sipai Crusader dina ram thianghlim Palestina ram lak tuma tharuma kum 174 lai indonaah khan Raldo Crusade beitu mi maktaduai ruk zet an thi a ni. Thite chu Pope chuan Vanram kai turin a puang nghe nghe. Chumi hnu lawk atang chuan ‘Indulgence’ an tih hi a lo piang leh a. Sual ngaihdamna lehkha zawrh, indulgence an tih chu Pope Clement VI chuan 1343-ah khan a pawm a. Thih hnua sual kanfaina hremhmuna (Purgatory) an tuar tur pawh pawisa tam tawk pein a tlak theih ta a ni. Hei hi Kohhran sum hmuhna tha tak a lo ni a, Pope Leo X-in indulgence a zawrhtir laiin Martin Luther-a’n a lo dodal ta a, Church Reformation ropui leh rapthlak a lo thleng ta a ni.

Hetiang hian ‘Hun thim lai’ kum 500 chhung vel chu Kohhranin êng a chhuah lo. A kalsual nasa em em a, a thara din leh ngawt mai a lo ngai ta a ni.

Siamthat Kohhrana Pawl Hrang Chhuakte : Indona chuan Europe pum a tuam a, Kristiante thisen chuan hmun tin a bual bawk. Protestant (Hnialkalhtu) an lo chhuak a, chungte chu Siamthat Kohhran kan tihte hi an ni. Pawl hrang hrang lo chhuak lâr zual tlem te kan sawi ang a, kan rama Kohhran awmte kan chhui bik deuh dawn nia.

Baptist Kohhran : Church Reformation a chhuah hma daih tawh khan harhna changa, huaisen taka kohhran lo sawisel ngam, Ana Baptist an tih ho chu an lo awm tawh a. Switzerland-ah Zurich Zwingli-a’n kohhran siamthatna hna a thawh khan a lo lar tan ta hle. An hruaitu larte chu Conrad Grebel (1498 -1526 AD) leh Felix Manz te an ni. Anni hi Protestant Kristian dik tak an ni a, Protestant ho chhuah hma pawh khan nasa taka tuarin sang tam tak an lo martar tawh a ni.

Ram tinah an darh a, 1609-ah khan Holland ramah ‘Ana’ hi paihin ‘Baptist Church’ an inti ta a. Hei hi Baptist Kohhran hming pua a lo chhuahna hmasa ber a ni. 1612-a England-a a din tan te, 1831-a Australia-a a din tante khan Baptist kohhran tiin an invuah zel tawh. Eng pawh ni se, a dintu hming hmertu bik hriat a ni lo. Khawvel hmun dangah chuan tualchhung inrelbawlna thunei tak mai ‘Local System’-in an inkaihruai ber. Baptist Kohhran nia inchhal, inzawm lo pawl hrang hrang 200 vel lai a awm a, kum 5 danah Baptist World Alliance tiin khawmpui an nei a. Chu chu an inthlunkhawm dan ber a ni. Ana Baptist ho hrin chhuah ni berah ngaih an ni.

Presbyterian Kohhran : Presbyterian Kohhran hi France mi, Kohhran siamthatnaa hruaitu lar tak John Calvin-a zirtirna atanga lo piang chhuaka ngaih a ni. Scotland-ah 1572 khan Presbyterian Kohhran an inti a, hei hi a hming bul intannaa ngaih a ni. Hemi hma hi chuan Reformed Church an inti a, tun thleng pawhin ram thenkhatah chuan Reformed Church tih an la ni.

Khawmpui rorelna chu an inkaihhruaina bul ber a ni. 1690 atangin Scotland ram Kohhranah a dingnghet hlen ta a ni. Wales ram bikah chuan Wales Calvinistic Methodist an tihte chuan kan rama mite hi an hring chhuak a, Pathianin chhandam turte a ruat lawk veka rin dan an zui a. Hei hi siamthatna hnathawktu lâr dang Zwingli te, Mennon-a te, John Knox-a te ngaihdan nena an danglamna tak pawh a ni.

Scotland, Ireland leh Wales ramte hi an darhna bulpuite an ni. Presbyterian hming pu, inzawm lo pawl hrang hrang 100 zet an awm a ni. Presbyterian tih hian Baptist te ang thovin inzawmkhawm lo pawl hrang hrang an ni tih hi hriat tel a tha ang.

Methodist Kohhran : Protestant a chhuah atanga kum 200 vel hnuah chuan Protestant Kristian ngeite chu an lo nguaiin, an lo muthlu nasa ta hle mai. Chutih laia harhtharna ropui tak sap rama thlentu John Wesley (1703-1791) chu a hmuchhuaktu a ni. Hun rei tak Anglican Kohhranah a bet a, 1742-ah an inrelbawl hrang tan. Mahse, Anglican Kohhran atanga an chhuah tak takna chu 1795-ah a ni. Anglican atanga piang chhuak a nihna tilangtu ber chu Bishop nei chi a nihna hi a ni. Protestant Kristian pawl hrang zinga hlawm lian pawl a ni reng. He pawl pawh hi a darhsarh hle, Methodist hming pu si, pawl hrang inzawm lo Methodist kohhran 200 dawn lai khawvelah an awm a ni.

Salvation Army : Methodist Kohhran pawl pakhat Methodist New Connection Pastor William Booth-a chu a dintu a ni. William Booth-a te nupain London kil michhe veng, zu zuar leh nawhchizuar tamna hmuna rawngbawla an vah chhuah ni, July ni 2, 1865 kha a din tan niah chhiar a ni. Salvation Army hming hi 1878 atangin a pu tan.

Sipai anga inrelbawl an ni a, khawvel pumpui inrelbawl dan pakhat (single administration) a inenkawl an ni. Thurin lamah chuan Siamthat Kohhran (Protestant) ang an ni a, Evangelical Kristian dik tak an ni. A la naupang hle a, kum 140 vel chauh la ni mah se, khawvel pumah a darh hmain, a thang chak hle. Mihring siamthatna (thlarau leh taksa) ah khawvel ngaihsan hlawh khawpin hma an la nasa a, an thawk tha hle a ni.

UPC : 1900 bul lamah khan America ram Bible zirlaite zingah (California bialah) harhna a thleng a, chuta tanga kal zel chuan Penticostal Kohhran hi a lo piangchhuak a ni. Kum 50 a tlin hmain pawl hrang 20 zet a piang a, an darhsarh hle. 1945-ah khan Penticostal Church of Incorporated an tih te leh pawl dang pahnihte chu infinin United Penticostal Church (UPC) hi a lo piang ta a. Thlarau lam thil uar tak an ni. Khawvel hmun hrang hrangah Penticostal pawl hming pu 500 vel lai a awm. Engemawzat chuan Trinity thurin hi an pawm a, UPC hi chu a pawm lo pawl an ni thung.

SDA : Seventh Day Adventist ho hi a bul tan dan chu Rev. William Miller (Baptist) chuan Isua lo kal lehna a puang vak mai a, a puan hnuah Isua a lo kal ta si lova, mi tam tak an beidawng a. Mahse, Ellen G. White-i, Isua lo kal leh hrilhlawkna uar tak mai chuan a chhunzawm zel a, thlaraua a lo kalna angah an hrilhfiah ta a ni. A bul intanna tak chu 1860 khan USA-ah a ni, tiin a chhiar theih.

Khawvel huap Kohhran hmasate leh High Church ho bakah Mizorama Kohhran lian chin, tuipui rala awmte an chanchin tlem te kan han lawrkhawm a ni e.

Credit: Lalnghakliana, RamhlunVengthar

Leave A Reply

Your email address will not be published.

This site uses Akismet to reduce spam. Learn how your comment data is processed.

WP2Social Auto Publish Powered By : XYZScripts.com