WHEN THE ROLL IS CALL UP YONDER – James Milton Black
KHITA HMING AN LAM HUN CHUAN
Tleirawl tuaitir Bessie tan chuan khawvel hi ruk rukna tual a ni a, retheihna pûk zaupui ang a ni. Pa tih chu ‘Zu’ tihna tluk a ni a, ‘Nu’ tih pawh ‘Hringtu’ ti-a sawi mai loh chu kawng danga hrilhfiahna pek a ni ve ngai lo. Nu leh Pa chu atan chuan ‘Ruktirtu’ tihna tluk a ni hial ta ve ang!
Retheihna thlalera ni em nat pawl ni turin lei ro a rawn rap ve a, retheia bul tanin retheiin a nung a; rethei lehzual tura hnuh luih a ni leh zel bawk. Tual uicho takngial paw’n mi chhang them thlauh chhara a mei a vei then lauh lauh theih laiin tleirawl Bessie tan chuan a thiang ve lo.! Hmangaihna hrui khat vuan ngai lo, an kawng zawh sual a thuhmun vanga inpawm lungawi chawp ta vel mai mai, zu ngawlvei, thawh peih loh avanga hlawh chhuah nei lo a nu leh pa chawm nan Pensylvania khaw pakhat Williamsport kawtthler kil kar zawng zawng hrutin ruk tur leh chhar tur melhin a hmanhlel ni tin a, tukchhuak a chhiar thin.
A tleirawl mitmeng duhawmna te pawh a thil melhin a zir loh avangin a khaw lo zo tawh a, ngainat awm rual chauh ni mah sela dinhmunin a zir tawh loh miau avangin a rapawm zo vel vek tawh. Ani tan chuan kawtthler lehlama vantlang pawl a rem ve lo a, an zak hnuai kau kara an thlauh palh chana kun ruk dek dek bak han beisei tur a awm lo. A tan hringnun hian kawng pakhat a sial a, chu kawng hnawk niai karah chuan kawng dang hre miah loin a kal ve hrep hrep mai a ni.KAWNG DANG A AWM
KAWNG DANG A AWM
A rawngbawlna mut mawh hnar mawha nei chung siin thawk mawh intih a bang thei lo a, a duh khawp thlen ni a hmu thei ngai lo. An khaw lian lutuk loa thalaite nun chu a kuta nghah ni hian a hre thin a, mawhphurna la tlak ni hian a inhre bawk si lo.Chavai taka Pathian a auh lawm lawm chang a va tam em! Ti chung chuan a rilru kaptu ber Williamsport thalaite Lalpa ke bula hruai thlen loh mawlh a hlau a, kawla ni chhuak chhiarin a hmanhlel ve hle thin.
Tukkhat a Biakin kal haw chuan kawtthler reh lai tak a pal tlang a, a inngaihtuah neuh neuh lai chuan amah tawk zawnga hmeichhe tleirawl lo kal hnak hnak hi a hmu hlawl mai. Chu tleirawl chu an khaw mi a ni tih a hmel leh hawiher atangin hre nghal thuai mah se a hre ngai hauh lo thung. A han en thin a, a sam chu a thur bep a, a taksa pawh thisen lum a luan loh ang mai hian a dang var pup bawk a, a thawmhnawte lah chu chhiahhlawh sâwn thuam pawh a tluk lo ang tih khawp hian a pawr chhe zo a, a mitmeng leh chezia mawlh mai chuan a tihrilhhai. Nei lo men hian a meng ngawih ngawih ngawih a; neih loh pawh a nei chuang lo ang tih theih hial a ni! A hmel a han en thin a, Pathian tih hming hi a la hre ngai hauh lo ang tih a ring a, vanneih thil thu-a a lo hre ve hlauh a nih pawhin Pathian chu tu nge a nih a hre hauh lo ang tih a hmu tlang chiang ngei mai.
Tleirawl chaurau takin a bul a rawn thlen meuh chuan kal pel thei ni hian a inhre ngang lo. “Mami” tiin a han ko ding chawt a. Chu tleirawl lah chuan nimin lama a thei ruk vang a nih ngei ring chungin a mah kotu lam chu hmel pha dai mai hian a han hawi a, vuak leh ben hlawh turin a rilru a siam fel nghal a. “Mami tu nge i hming le” a han ti dam diai mai a. Chu tleirawl chu a meng khup lap a, chhan ngaihna a hre lo. “Mami tu nge i hming min hrilh thei em” a han ti dam leh thlap a. Chutah zet zawng, duhsaktu awka a nih a hrethiam ve ta. “Bessie ka nia” a ti sap a. “A ni maw, i hming a nalh hle mai” a han tih leh hnu phei chuan ngaihngam takin a chhawn ve thei ta.
Nun kawng dang a la awm a ni tih hre ve ngai lo Bessie chuan Pathian chu a lo hre ve thin meuh mai a, a rin loh takin Pathian chu tu nge a ni tih pawh a lo hria nia! Biak in thawm hriat phakna hmun atangin a rualpuite zai dal dal te pawh vawi tam a lo ngaithla tawh thin a ni awm e. Chung mite chu a awt ve thin a, awh phaka a ngaih loh avangin a en liam leh mai chauh thin a lo ni.
A vawi khatna atan inkhawm ve tura a han sawm meuh chuan chu tleirawl chu a va han phur tehlul em! A meng de ser ser a, a thisen zungzamte pawh an rawn nung thar leh ni ber hian a lang!
Chawlhni a rawn thleng a, phur tak maiin Bessie paw’n Biak in kawng a rawn zawh ve a, amah sawmtu a mitmei hmasa ber a, a hmuh hnu chuan ngaihngam zanin thuthmun a rem ve a, hming ziahna bu-ah pawh Bessie tih hming a chuang ve ta kalh mai. A lung a va han awi em. Hlim takin ral atanga a lo zawm ve riai riai thin chu a aupui ve thei ta bawk nen. Engkim mai chu a tan thil thar vek a ni a, khawvel pawh hi tleuh fai hlim ang maiin a thar sar asin.! Ta tang chuan inkhawm a thlah leh ta ngai lo a, a hming an lam pawhin phur takin a awm ve lauh lauh thin.KHAW NGE..?
KHAW NGE..?
Chawlhni tuk a ni a, Williamsport tleirawl rual chu an inkhawmna hmunah an tlim leh hmur tawh a, a tih thin ang bawkin James Milton Black chuan hming a han lam leh a, an kal tha thawkhat. A tawp bera Bessie tih hming a lam lai chuan phur taka chhawn a nih leh ngei a ring a; mahse chhawntu aw reng reng a awm lo. A reh hmuk a, a han hawi kual a, Bessie hmel reng reng a hmu lo. Chumi tum chuan inkhawm boruakah a cheng thei mawlh lo. “Khaw nge Bessie? Khaw nge Bessie..!!?”
Inkhawm an bang a, khaw dang hawi loin Bessie te in lam a pan ding nal nal a. Kawngah lah chuan rui pai chawm chawn hian a pa a tawk a. An in a va thleng a, kawngka biang nghengin a nu lah a lo tlu zawi der bawk ! Hawihhawm thei pawh a ni tawh lo. Inah a lut rawk rawk a, in chhung kil tin a han melh kual a, chuta a thil hmuh chuan a thin a thawng ngei mai! Bessie chu khumah a lo mu hnawk nuai a, a lo khur bep bep a. A taksa a han khawih a, a pang zawng zawng chu meia hem zawh hlim ang mai hian a sa vur mai. Bessie chu thih ngamin a na a, thih a sual mek a lo ni.
Dim têin a biangah a chul a, “Bessie, inkhawm hming kan lamin i aw hriat tur a awm ta si lo a, i lo dam lo reng a ni maw, ” a han ti dam thlap a. Bessie chu a rawn meng siar siar a, a thawk a tawp tawh dawn a ni tih a hai lo. A zawhna chhan nan hun a tepter tawh lutuk. Ti hian a rawn tawng ta zawk a. “Ka pu, he leia ka hming an lam hunah awm ve thei tawh dawn lo mah ila Khita ka hming an lam hun chuan ka awm ang” tiin. A chhing riai riai a, a retheihna khawvel chu a thlah fel ta. He lei hming lamna bu-ah a hming thai chhiat a ni tawh ang a, nunna bu-ah a hming a chuang tawh thung ang.
Ni e, khita a hming an lam hunah chuan phur takin a awm lauh lauh tawh zawk dawn a ni.HLA THAR
HLA THAR
Bessie thu sawi chuan a ngeng a chhun a, a thinlung a vaw keh vek ni hian a hria. A han ngaihtuah chiang thin a, a lung a chhia a, a mittui chu dan zawh rual loh hian a liam zung zung mai. A piano ngainat em em hmaah a han thu a. Vanram ngaih hla, Bessie thu hnuhnung nena inmil tur tum a han tum a, chutiang hla reng reng a ngaihtuah chhuak zo lo! Chhunglam atang hian “Nangman siam ta che” ti-a hrilh a ni a, ti chuan he hla hi a lo piang ta a ni…
WHEN THE ROLL IS CALL UP YONDER
When the trumpet of the Lord shall sound, and time shall be no more,
And the morning breaks, eternal, bright and fair;
When the saved of earth shall gather over on the other shore,
And the roll is called up yonder, I’ll be there.
When the roll, is called up yon-der,
When the roll, is called up yon-der,
When the roll, is called up yon-der,
When the roll is called up yonder I’ll be there.
On that bright and cloudless morning when the dead in Christ shall rise,
And the glory of His resurrection share;
When His chosen ones shall gather to their home beyond the skies,
And the roll is called up yonder, I’ll be there.
Let us labor for the Master from the dawn till setting sun,
Let us talk of all His wondrous love and care;
Then when all of life is over, and our work on earth is done,
And the roll is called up yonder, I’ll be there.
Credit Author: Pu Asawma