Your Daily News

Mobile App ah chhiar theih in a awm e

KEINI EVANGELIST- TE HI!*

0 139
  1. *KEINI EVANGELIST- TE HI!*

( Kei, he thu ziaktu hi chhum lo chat lovin, Evangelist rawngbawlna lamah hian kum 11–te lek sulhnu ka la nei a. Ziak tur awm ka ni hauh lo na in, Hetiang lam thuziak hi hriat tur a awm ngai loh avangin, ka lo dai ve tawh ram ațangin leh, ka hmathlir dan ațanga hethu hi ziak ka ni. Min han chhiar chhuah sak la, i pawm zawng a nih chuan i lo thawn darh zel dawnnia.)

Mizoramah hian, mahni puanthuah têl a, mahni in leh lo chhuah san a rawngbawltu hi kan tam em em a. Speaker tlu chhe leh ta te, counsellor da leh ta te hi kan va tam em! chungte avang chuan tunah chuan Evangelist ten rin an hlawh zo lo a, tunah chuan ar chuk tuilo khawpa chhuah duh tawk mi pawh an tam na rawh e.

Camping leh crusade, campaign neiin Zoram dung leh vang hi kan suar tluan a, kohhran hrang hrangah kalin, mahni chên ngai lohna hmunah riah rûn kan va rem leh ngawt țhin a. Mi tam tak leh kan Rev te aw ka ngei ațang pawn camping leh crusade tih vel chu țul tih lohna a lo lian chho mek zel a. Mahse hei aia țha zawk dang Pathianin hmanrua min pek hma chuan kan ram tan chuan ala țha ber tho tho bawk si.

Rawngbawlna hmunah boruak neih țhat loh kan hlau a, style hrang hrang kan apply kual a, mahni team tih dan chu țha bik riau hian kan hre țhem mai a. Min ruaitu kohhran lah chuan, “nangni team tluka tih dan țha leh chiang hi ka la hrelo,” ti in mi an han fak chhunzawm ve zel bawk a. A lawm awm zelah ngai phawt ang aw.

Kohhran țhenkhatah chuan, thatchhe chawheh vak mai mai ti a minlo sêl tu tawk an awm leh țhin. A lan danah chuan anih hmel fû a, leh lamah chuan chutiang mi, counsellor zingah pawh mahni khua leh veng lama thatchhe ve tak an lo awm thei e. Mahse, anihna tak zawkah thatchhe chawheh vak mai mai chu kan ni bik lo a sin. Mi taima, tum ruh, mi inpe lo tan chuan rei tlin hi har tak a ni ve a. Chuvang chuan mi țhenkhat hian nuam tura ngaiin, Evangelist tlawm sana, da zui leh ta hi tam tak an lo awm tawh a. Chung mite chu Buhpho vengah pawh an tlak tawh lo ve an tih chû! Dik tak chuan, rawngbawl tura mahni inlum chhuahsan hi chu a lo har vak lo. Bawlna hmuna mahni in kalsan/ thihsan hi a lo sak țalh țhin a. Chutiang thei lo apiangin an tlawm san ta mai țhin zawk a lo ni.

A tui țha țha eiin mi duhsakna hlir in chang a, anuam awm bik tiin min sawi maw! Ni e, a dik alawm. Mahse, a tui țha țha ei a, mite duhsakna dawng tur hian zan tairekah te vawi tam kan țawngțai a, chhuan tam tak chawnghei a țawngțai a, mahni lama insum ngai tam tak insum a, mahni invuiliam hmasak zet a nih loh chuan heng zawng zawng hi kan hlawh bik ngawt lo a sin. Rawngbawlna atlak țhat theihna tur hian theih tawp chhuah angai a. A rawng kan bawlsak Pathian ropuia alanna hmunah chuan, a ropui zingah keini hi kan lo lang ve mai chauh zawk a ni tih te tal min han hriatsak ve teh u khai. Inhmuh, anuam lai leh mawi lai chauh hi a ni lo nia, hetiang thleng tura kan beih dan hi min chhut pui ve thei lo vem ni?

Hlawh nei lo vin, mite duhsakna leh kohhran mipui thawhlawm tlingkhawm mai mai hmangten kan rawngbawl lehna tur chu Pathianin min lo tum sak ve zel a. Hlawhnei si lo a rawngbawlna kal pui hi tlangval, pa tling lung fing chin tan chuan thil har tur tak a ni ve a sin. Synod Revival team hian hlawh anei bik ngawt lo va. TA/ DA te lah chu sawi tham awm lo tak a ni. Chuvang chuan Evangelist nih hi thil nuam leh thlan awm tak chu a lo va ni lo em! Phur thut thiltih a teama rawn kal dil a, rawn kal ve hi mi tam tak ka lo kalpui ve ta. chung mite chuan, alan dana a chák awm ang a nilo tih hriain, rei loteah an tlawm san leh nuk tawh a nih si hi maw!

Counsellor an lerh duh, an zei si, țawngkam an thiam si tih hi kan chanvo a ni leh a. Ni e, a lanna tlang ațang chuan a dik thei awm e. Lerh tam tak an awm ang. Kalna pianga ngaihzawng nei counsellor pawh an lo awm a ni thei, mahse hei hi an hre lo a ni. Keini ang tan chuan, rawngbawlna hmunah boruak a țhat chuan kan awm lai na na chuan kan hero ve thei khawp mai. Arpa chan lai chu a awm ngei. Mahse hringnunah hian min rawn be tu lo biak loh ngawt te hi thil nih phung a ni ngai lo a, thil tam takah chuan dawtthu leng vak tam tak vangin kan mawina Isua hi kan lo ti tlawm ve leh bawk țhin a lawm le.

Counsellor lawm fe fe hmeichhia hi an tam em em a. Evangelist lama tawn hriat nei tawh, lo kal siniar tawh te erawh hetiang lama sawi kai an vang hle a. Phur thuta rawn kal, luck chak vang a kal ka ti mai. Chungho vang chuan sawihnawmin kan awm țhin. Mahse tlangrel leh sawichhiatin Evangelist hi awm mah se, Pathianin minla hman zel chuan a tawk em em a ni. Pathianin min hman a țhulh miau loh chuan ava tawk em! Hetiang lam kawngah hian ka counsellor pui te hi ka challenging duh cheu, rinawm leh chhel takin, tlangrel leh sawichhiatna karah pawh hnung tawlh lo ang aw tih hi a ni.

Pa pakhat chuan heti hian a ti, *Pathian hmingin dawt hi kan sawi zak zak mai a ni,* tiin; a nih duh hmel mange aw ka ti țhin. Kumtluana mikhual nih chuan, Mizopa danah mikhualin duh an thlangin chak zawng sawi dan va ni suh. I ril țam em min tih chuan, țam eltiang mah se, mawi hawihah, “țam lo e” han tih a lo ngaih changte hian aw! Țam e han tih mai hi ava chakawm țhin em! Rilțam hi kan sepui ruah tuar tlawk tlawk mai zel bawk si a maw! Duh zawngte, ei chak zawngte kan sawi ve ngam tawh lo a. Thlenin ten mahni in angah ngai rawh han ti eltiang mah se, badroom-a va luh a, duh duh huna Tv leh computer ngampa taka khawih leh on ngam a ni bik chuang si lo. Mahni in anga kan awm lahin, min sawi zui lehna mai mai tur a ni zel bawk si. A engti zawng mai pawh hian kan nun hi alai a, a chep vel vek hi a ni ber mai.

Veng țhenkhatah minlo ngaisang a, minlo star tu tawk an an awm ve te hian alawm awm țhin. Mahse kan nihna tak hi hria se aw! Mahni veng lamah chuan eng vak ni lo ve te te te, chhungkaw ropui tak ni lo te, mi sunday sikul hall chhuat daia mu kawi mu kawi ve maite min han ngaisang ve tlat te hi chu, min ngaisang der vetute hi an leh fakawm ngawt mai. Mahse heng zawng zawng hi tisa taka kan hrehawmna tur ti zia awm tura Pathian hnathawh kal hmang a lo ni zawk reng a. Lalpa hi a va țha em!

Lei lama chhuan tur neilo Evan lu mum ve mai mai te ni țhin mah ila, Lalpa avang chauh in, kan hmaah hian lei lam mi ropui tak tak hi an lo bawkkhup nual tawh a. Tisa zawna an thu kan ngaihthlak zawk tur ten, kan khabe liam chang reng renga hmaizangthal hâ a min han en changte hian, chawimawina leh ropuina hi amah Lalpa avangin kan hum leh zual hian ka in hre țhin.

Keini Evangelist-te hian mi hrang hrang harsatna thuruk tam tak hi kan pai țeuh a. Mi zawng zawng sual hi kan phurta em maw ni chu le tih tur khawpin, mitin chi tang hian an nuna an thuruk ngawih ngawih an hrilh ngamna tur ni tura Pathian thuruk enkawltu ni tur hian mi rinawm nih angaihzia te ka chhut hian; mahni lam insitna chu na ve țhin hle mah se, Pathian hian minlo va ring tawk em! Veng khat thlarau nun kawng kan ko a nghaha an awm ngawt țhin te hi chu, beih ve fat fat hi angai țhin a sin. Dik tak chuan, kan chanvo, kan ko a Pathianin angah hi ana mai lo hle a. Mahni nun in martar huamna tak tak thinlung ațang lo chuan rei tlin chi a ni lo a, mahni chakna phei chuan kan zolo, in mi țawngțai pui hi kan ngai reng a sin.

Kan tlin lohna leh fel lohna, kohhran hote duhkhawp lohna tam tak pawh kan nei ngei mai. Tling inti bika rawngbwl tumah kan awm lo. Min ko tu Lalpa avang chuan kan thawk ve mai țhin. Chuvangchuan, keini Evangelist te hi tisa taka ngaihsan tur kan awm lo ve. Mahse min sel a, min diriam mai lovin, kan chak lohna zawnah te minlo țawngțai pui țhin ve turin zoram mipuite hi kan mamawh cheu a ni.

Kohhran Upa leh kan Pastor te, KTP leh kohhran hmechhia, Pavalai chen hian; kan chheh vela kan unaupui sualin aman mek leh kohhran thlarau lam nun chau leh ngui tawh te, khup zawi leh bân uaithla tawhte kai harh tur hian chet lak an tum ta lo em ni tih mai tura alan chhoh mek lai hian, chung mite chhanchhuak tura kan ram tana Lalpa bêl ruat Evangelist te kan enna mit leh kan hmuh dan/ ngaihdan thinlung hi her rem hretin, i thawk ho zel ang u khai. Kan ram kohhran thlarau nun siamțhatna kawngah hian Evangelist te rawngbawlna, camping, crusade, campign- te hi Pathianin a thlakna tur hmanraw dang min pek hma chuan hetah hian kohhran hoten lungawi i zir thar leh rih ang u.

Camping, crusade kan nei a, kan rihluaia, arbawm chhe hal ang maiin kan reh leh duak zel. Team ho an haw a, kan da leh zel tho, awmzia a awm lo ti mai tawh lo ang u khai. Team ho mawh puh zel hi kan sim a hun tawh. Dik tak chuan, vawikhat campa mi 2/3 talin nun nghet an neih zui a, kohhran tana mi țangkai kan chherchhuah tluka hlu a awm chuang em ni. Kan Lal Isua meuh pawn thlarau bo pakhat man turin, nilengin a țhut chilh ve tho a sin. Duh hun hunah kan hlim ngawt theih loh hi. Evangelist rawngbawlna vanga kan hlim chhung reilote hlutzia hi hmuthiam thar i la. Harhna reng reng hi min chamchilh tur a ni ngai lo. Min chamchilh se tu nge tlin ang? Kelkang harhna meuh pawh a rei deuh chuan kan ning a nih si kha maw.

A tawp berah chuan, Evangelist kan rawih reng rengin, kan rawih turah fimkhur a hun tawh hle. Kohhran tam taka zirtirna hrisel tawk lo avanga buaina chhuak hi Evan tute emaw rawngbawlna avanga chhuak an ni deuh zel a. Heta țang hian kan rawih tur kawngah kan fimkhur a hunzia a ti lang nghal. Tin, keini Evan lam pawh, kohhran kalphung leh Pathian thu zirtirna kawngah pawh kan fimkhur a ngai zual hle tih chu kan inhrethiam chho zel, awm laia in fak satliah ngawt hi kan lawm lo, a hnuah min rel a sawichhiat zui mai hi kan hlauh ve ber leh kan fimkhurna ve ber anih țhin vangin, Evangelist hmakhua ngai tak chunga kan duhthu an sam tawk lohna laiah in mi finchhuah leh thurawn hi kan mamawh nasa zual țhin. A chhan chu veng hrang hranga kan kal kual zel dawn avangin a țha lo intih awm chu sawi hreh tur a ni ngai lo ang.

Pathian leh kan ram tan Evangelist hi lo vul zel se la, kan ram maichama mei a mih mai lohna turin, Evangelist te rawngbawlna hi min țawngțaipui zel turin kohhran ho te kan insawm thar leh a ni e.

*Mr Spy (Counsellor Siniar)*

Leave A Reply

Your email address will not be published.

This site uses Akismet to reduce spam. Learn how your comment data is processed.

WP Facebook Auto Publish Powered By : XYZScripts.com