Your Daily News

Dairy Of Lalrinawmi

0 251

Min rawn call-a, a trap zawih a, “Te, kei chu khawvelah hian beisei tur ka nei tawhlo..kawng diklo a ni tih hrereng chungin ka zawh lui a, tunah chuan a tlai tawh, kir leh turin ka kal thui tawh lutuk, i la hria em? Middle school kan kal lai a kan rilru lo thianghlim zia kha, ka ngai thin a sin aw..tunah chuan khawvelah hian nang chiah hi thian tia sawi theih ka nei tawh.”

“Te, Pathian meuh pawh hian min ngaihdam theih ka ring tawh lo..keimah leh keimah pawh ka in haw tawh a ni si a. min hmangaih vangin thla hmasa khan MHIP leh VDP ten khawlai lun lai takah ka sam min meh kawlh sak a, a na ka ti lo; min diriamna zawng zawng kha. Mahse chung zawng2 ai chuan kan teacher, (a chanchin pawh ka hrilh tawh che kha) thil chhe te ka tihsual vanga min vau bet a, ka thianghlimna min laksaktu khan, ‘MI HURNU’ ti a min kawh sawk2 kha na ka ti ber.

Hmanni deuh khan gospel crusade ah Pathian thu an sawi kha Biak-In bul rose buk hnuaia trang khan ka ngaithla ru a, Te, ka ngaithla ru anih chu (a insut hlawp2 a) ka thusawitu in, “Isua chuan, sual neilo apiangin deng hmasa rawh se. a ti a, a mal te te in an kalbo ta vek a, chuvangin nang leh keiin tha kan lo intih em2 hi, Lalpa mithmuh ah chuan misual ber nen kan inang tlang vek.’” a tih laia, Hallelui ring ber2 te kha min beng na tu an ni si.
Te, AN NI CHUAN MIN DENG NGAM A SIN, tunah hian thutlukna ka siam fel vek tawh, hetiang reng2 a nun hman ai chuan thih hi ka tan a nawm zawk ka ring, min dem suh aw.”

‘Rin, khaw nge i awm? Ka lo kal ang, eng thilmah ti suh……’ Ka sawi zawh hmain, “Middle school thlang, tlaizawng kung hnuaiah khan ka Diary polythene a tuamin ka hnutchhiah a..khawngaihtakin min lo kawl sak dawn nia..Te, nang tal chuan min demlo ang chu ti ro..’ (a tawngkam tawp ber a sawi rual a a lungchhe trap ri kha ka theihngiilh tawhlo ang) phone a dah a..ka call back nghal a, mahse switch off a inti zel a, mu leh mal ka nei tawhlo. Ka mittui a dir zung2 a…mahse reilote ah ka harh chhuak zawk a..zanlaiah an veng lam panin kan chhungin kan tlan nghal a


Ni e, chumi zan dar 3:15 velah kan middle school office hnuaiah, ka tette atanga ka thian ngainat ber mai, humsual a dai laklawh avanga khawtlang hmelma..LALRINAWMI ruang chu a inkhaina hrui hrual atangin ka hlang thla ta a nih kha! “RIN, i hringnun zinkawng bumboh takah i thlavang hauh turin kei, i thian tha ber anga i chhal hian i hma-ah pen khat pawh ka lo din ngai loh avang hian min ngaidam ang che aw..LALPA, a thlarau hi lo ngaidam mawlh ang che.”

Lalrinawmi Diary chu hunawl ka neih apiangin ka chhiar thin a, mi invawng fel tak anih avangin High School a kal lai atranga a ziak tawhin diary pawh chu bu li nga lai a ni a, chhiar hreawm khawp a thil ziah a nei tamin ka mittui pawh a tla hnem reng a, kum 2012, August thla laihawl a (a thih hma thla) vel atranga a ziah hi tlem tlem kan tarlang a nge.


August 12, 2012 ( Sunday) : Vawiin nidang ang lo takin khua a thiang nuam hle mai, nizan lamah ka chauh deuh avangin ka inluah chhete a ka khum ah mu in ka diary chu ka phawrh leh a, ka thrian neihchhun engkim ka sawi theihna awmchhun a ni a, ka hunawlah chuan ka kawm reng mai a nih ber hi.

Tukverhah dakchhuakin ka hawi kual vel a, kawmthlang nula in tual a lo phiat sarh sarh a, a bulah a naute ho an lo infiam nak nak hlawm a. Reiloteah a nu rawn chhuakin tual chu a rawn tihfai pui a, chhungkaw hlim tak an ni reng bawk a, nui var var chungin ka thlir reng a, mahse…

A nu in ka tukverh lam a rawn hawi chuan a nui hmel chu a tawp chat mai, a fanu bengbulah chuan engemaw a sawi sar sar a, inah chuan an lut ta diak a, vawilehkhatah mahni inkhawngaihna in ka khat ta thut a..aw..khawvelah hian ka va riang bik tak em..min hmangaihtu pakhat tal han awm ve se aw…
Ka nu, aww..ka nu mawlh kha, Nu..i fanu hi min han enteh..nang chuan min khawngaih ang ti raw…min boral san dawn a i thu min chah te kha…mahse Nu..hmeichhe tenawm mai ka ni tawh si a. Ka nu i bulah rawn kal ve mai ka duh..mahse..he taksa hi ti boralin i hnen rawn kal tum mah ila..i bulah ka rawn thleng chuang dawn si lo..Nu..min ngaidam rawh.. (a ziak hi a mumal tawh lo hle a, chhiar hleihtheih ani tawh lo..mittui farna hnu ni awm tak takte a val kelh kulh a..)

August 14, 2012 (Tuesday)
Zanin chu ka chhuak lo ang…ka naupan lai thlalak ho te ka phawrh chhuak a, ka pa thlalak pakhat chu ka la kawl ve a nih hi, mahse ka pa hi chu ngaihna ka neilo, ka nu in min pai lai khan a boral tawh a, kan inhre hman lo tlat..Diary..ka nu thlalak hi han enteh, min khawngaih hmel i ti em? Hetah hi chuan a hlim hmel ti raw..a nui hmel hi a mawi a nia aw..Hei hi chu Middle School ka kal tran tirh dawn a ka uniform min thrui sak anih hi..ka form kha min thui sak vek a nia sin..mahse..tunah chuan..khawvel a ka duhloh ber leh ka suangtuah ngailoh eizawnna kha ka ti ta si a. Diary, kei chu than thi ka nei fel awrh tihah khan ka thianghlimna laksak in ka awm tawh a, kha misual, zirtirtu hurherh lutuk vang khan maw ka nun a chhiat..ka nu nen khan court ah khan kan han khing ve takna a..a khingtu zawk khan pawisa kan chawi treuh zawk anih kha..ka nu khawngaih thlak zia kha aw…Nu..min kalsan hma ka ti, i fanu hi maw..Pathian hnenah khan ngaihdam min lo dil sak rawh aw..

August 31, 2012 ( Friday):
A tawp ta, Diary…beisei tur kan nei tawh lo..a tawp vek tawh..HIV POSITIVE maw ka lo nih! Ni e, kei tluka kai phu an awm chuang hlei nem..mahse..mi eng zat nge ka hnen atangin kai tawh ang…Lalpa min ngaidam rawh..Ka thian, Crusade lai anih kha tiraw. BiakIn ah tal ka va kal ve nge aw…

September 2, 2012 (Sunday) :
Diary, hei ai baka zahna hi a tawn theihloh ang ti raw…khawlai lun lai takah Sunday tlaiah leh nghal maw diriam ka nih. Min sawisakna hi chu na hle mahse ka nun tichhetu te ngei ngeiin..Mihur..min ti maw..Diary…zanin chiah hi nang nen kan awm dun thei dawn ta..naktuk hian kan inluah atrang hian petchhuah ka ni dawn si a…ni e, engkim hi titawp vek tawh ang aw…kalna tur pakhat chiah ka nei..he taksa tenawm hi chawl hahdam tawh rawh se..ka eizawnna hi ka chhunzawm a rem tawhlo a..kei vangin midang nun a chhe tawh tur ani heklo…Ka nu, ka thiltih tur hi ka va hreh tak em…min ngaidam mawlh rawh aw. Diary, mangtha aw..nang chuan awmna tur i nei dawn a nia aw..ka thian thra a ka ngaih, ka tenawm em vanga ka biak ngailoh hnenah i awm dawn nia. Chutah chuan maw..he hmeichhe tenawm, khawtlang hmelma…natna tenawm pai leh nghal hringnun chanchin hi dawt sawi miah loa i hrilh ka beisei..mahse maw..khawngaihtakin khawvel hian min dem zui suh se.

Leave A Reply

Your email address will not be published.

This site uses Akismet to reduce spam. Learn how your comment data is processed.

WP2Social Auto Publish Powered By : XYZScripts.com
error: Content is protected !!