Pawl 10 ka nih in kum 18 ka ni a, ka sek phiar khat tlat mai a ni. Ka tha hi a za em em mai a, hneh loh ka neih pawh ka ring lo. Ka pa hian ka tha hi a it thei em em mai bawk a, chaw ka heh vang ni hmiang ka ti mai a.
Hemi kum hian ka pa ten lo atan Kelsah ram an nei a, in 15 velin au utin kan vat a, a nuam khawp mai. Sikul chawlh apiang hian ka pa chu hlo ka thlawhpui thin. June Thla vel atangin kan zauvah chuan Sakei a rawn inlar tan ta a. Thenkhat chuan an hmu leh zeuh thin a, thawm a nei fo bawk a. Kan kawmchhak pa Pa Bata pawh a hlo thlo lai hnai tak atangin a au khum vak mai a, a tlanchhe hial a ni.
Pa Bata chu Sakeiin a tihthaih vang pawh ni lovin August tla velah a damlo ta vak mai a, thla khat aia rei mah a bawksawp ta reng mai a. A lo a hmin tawh si ; ri pa ho an committee a, puih an rel ta a. In tin atangin pakhat zel thawh chhuah nise an ti a, kei chu ka pa aiawhin ka chhuak a. Inrinni a ni a, pachang hlir 12 lai kan thawkchhuak a. Kan zinga upa ber Pu Siama chuan zawh ngei ngei tur a ti si a, kan tang ngei mai. Hah takin tlai takah kan zo hram a.
Kan haw kawngah chuan kan inzui diah diah a, kei chu a laihawl velah ka kal a. Khua atanga hla vak lo Pu Vawra Ser huan kan thlen chuan khua a thim tan tawh a. Unau hmel hai an tih ang vel hi a ni. Pu Vawra huan ah chuan kawng chhakah thing awn deuh du hi a awm a, thing awn pelh hlawtah chuan kawng hi a kawi deuh bawk a.
Thing awn zawn kan thlen lai tak chuan kan zinga kal hmasa ber chuan, ‘Saw SAVAWM’ an tih thut mai leh…
In thurual ang hrimin kawng chhaka thing awn lam chu kan pan chho dial a. Chu thing awn hnuai, rualrem lo em em maiah chuan pachang 12 zet te chu tihtak zet mai hian a LAI awm inchuhin kan han in-pang-aw-zialta mup mup mai a nih chu!!
Chak ka in tih ve teh reng nen a lai chu ka chang hlei thei reng reng lo mai a. A laiah ka awm emaw ka tih lai te hian kan vir mup mup a, a sirah ka lo awm leh thin a. Tupawh mai chuan a lai awm tumin tha tawp kan chhuah vek si a, a hau tak ngei mai. A lai tak tih loh kha chu a sir vek a nih avangin a sir kha a tam si a, kan inchuh lai chu a zim em em mai si. Pachang 12 zet Savawm hlau a uang miah lo leh tawng miah lova a lai awm han inchuh chu a nuihzatthlak miah loh!!
Kan tang lutuk chu kan vir thuak thuak hlawm mai a. Pachang leh pachang hmuiah kan infawp thawi thuak thuak reng mai a ni. Reiloteah ka kawrkilh zawng zawng chu a tla nghal vek mai a. Tu kawr ber nge tih hriat si loh hian a tet ri leh kawk thin a. Mi sazu te hi duh vang pawh ni lovin kan ham thawi thuak thuak reng mai a ni. Savawm hlauh nen, hah nen, a nawm loh dan chu hrehawm tak a ni.
A buaithlak ber pakhat chu kan iptepui ah kha a ni. Kan vain kan ah vek a, a chhunga chempui leh chemkawi/chemkawm kan ak vek bawk a. Han tal nat deuh dawn khan tute emaw hian kan iptepui chu ah lo kar cheh bet tlat thin a. Bula mite iptepui chep bet tu nih vang ringawt pawh khan a sir lamah ka petek fo mai a ni. A chang leh tu lu nge min tauh tih hriat mang si loh hian ka khabe chu a ri leh chawrh thin a, thin hi a rim tuk mai a ni. Ka kezungpui lah chu a na em em mai lehnghal a, tu min rahna nge tih lah hriat theih hek suh.
A lai chu kan inchuh rei tawlh tawlh a, kan thaw rang tual tual a. Tu mai pawh chu kan nal pulh vek tawh a, mi kut man pawh tum ila man ngheh theih pawh a ni tawh lo. Bula mite banin hmui a deh palh pawn a al puat tawh mai. Kan thaw huam huam mai a. Kan kawmthlang pa Pa Hlua a thaw ring ber a, zak-kha a la nei zui. Hetiangah hian ka tel vawi khatna a ni a, ka mang a ang takzet a ni !
A sir lama ka petek chhuah apiang chuan kawng lam chu ka zuk melh thin a, Savawm ka hmu lo hrim hrim. Midang pawhin an en vet tho ka ring a, an hmu bik lovang. Mahse a hlauhawm loh tih hre reng chung khan kei pawn a lai awm chu ka chuh ngar ngar mai a ni. Kan inchuh laklawh tawh a, bansan mai mai chi a ni lo.
Mak em em mai chu a chak chak khan a lai kan chang chuang lo kha a ni. Kan zinga sek ber leh lian ber U Tluanga pawh vawi tam tak a sir lama a rawn bu chhuak leh durh thin ka hmu a ni. A cher chhe ber Pu Siama kha a lai a chang tam ber zawkin ka hria. Hetiangah hian a lo tel tam tawh ang a, experience a nei tha a niang ka ti deuh mai a.
Hah hnap khawpa a lai awm kan inchuh hnu chuan zaidamna in a tlin tawh hlawm lo a niang, a then chu an inngur tan ta. Kei pawhin tumah ka hlau tawh lo. Ka iptepui chhunga ka chempui ah, ka pa tah hriam var chu ka hre nghal rauh rauh mai a ni.
A tawpa tawpah chuan kan zinga upa ber Pu Siama chu a harh chhuak ta. Vin deuh thak hian, “E khai !! Hetiang ringawt te chu a, keiman kan fiah ang e,” a ti a, kawng lamah chuan a chhuk ta a. A va hawi phei a,
“BAWNG a nih saw.”
Kan zuk en ve chuan, Pu Manthanga bawngpa, chal rang rek ruk hi in lam pan si hian a rawn leh hawi ho mai a. Tumah kan nui chuang lo !!
Pu Siama kha harh chhuak har deuh se chu zawn haw ngai kan awm hial maithei a ni!!
Credit Author: R Zonuna RL