UR LAWK ZAN by; Ngura Sailo

UR LAWK ZAN

By; Ngura Sailo
Krismas tinuamtu leh masi tingahhlehawmtu chu urlawk zan hi a ni kan ti lo thei lo.
Naupanlaite khan a va lo nuam thin tak em! Naupan lai tlaivar ve ngei tur niin kan inngai a. Tlai ni a her liam a, khua a lo thim meuh chuan puankawp nen Masi thlen inah kan inpu lut a, kil khatah kan indah a. Thiante nen zan tir lamah silai (a mu nei lo) kep kahpuah chi nen khan kan indo fiam a, nuam kha kan va ti thin em! Nu leh pa te’n pocket money an neih ang tawk min pe a, kan duh duh leiin kan ei vel kha a ni a., nuam ve tak chu a ni. Zan a lo tlai deuh a, nu leh pa lengkhawm an tin tan a, thalai lamin social function an buatsaih a, social fungtion a zawh meuh chuan mahni puan theuh la in kan mihil ta thin kha a ni a. Zingah phak chalha mengin kan thu tho thawr a, tlaivar inti takin in lam kan pan thin. Chu’ng hun chu naupan lai hun a ni.

Hun a kal zel a, ral khat ngaihzawng pawh kan nei ve ta a. Mahni huat loh zawngte tlaivarpui ngei tumin kan hmahlel a, chuti chung chuan thianzaho hranga tlaivar ve tak mai mai pawh a tam khawp mai. Thian-zaho zingah ral khat ngaihzawngtean tel kumah phei chuan Masi kha hmang fuh hliah hliahi Kan inhre thin.
” Tu mah interek hran loh tur”
” Thalai zaw.g zawng Masi thlen inah tlaivar vek tur ” an tih kumah phei chuan program duan sa a bam vek thin a nih kha.
Kum a lo upa chho ve zel a, mahnia Masi pocket money intuak ve theih chinah phei chuan kan hawi chám lah tawh mai a ni. Mahni tawkah kan ngeng ngal mai thinte kha mi dang tan kan leh thalai hruaitute tan chuan kan lo va ngeiawm thin dawn tak em!
Urlawk zana ei tur chhang dengin kan han phusa huai huai thinte kha a va ngaihawm thin em. Krismas ruai thehna tur chizawl hnah laa ram hnuaia thalai rual kan inkap chhuak thin mawlh kha krismas boruak tinghahhleawmtu a ni ka ti lo thei lo. Mahse hun a lo inher zel a chizawl hnah hnawlin thlangra-in ruai kan theh a. Tunah chuan thlangra dahthain dawhkan kan siam a, mahni thleng mahni duh zawng zawng lain, infai reng chungin kan kil hrang theuh tawh a, hun changkang zel hian Krismas boruak nawm dan pawh a her danglam zel zawng a ni.
Urlawk zan a lo nih meuh chuan mi tin rilru a phawklek a ni ber a. Tlangval hawklak deuh hoin ruih phet an tum a, inhawlo fal deuh lahin khohhran lam hlamchhiah in thian-zaho hminga in fianrial deuhah lo interek phet an tum bawk a. Kawthler leh Masi thlenin bul hnaia naupangho a pawl a pawla silai a indo lah an kat nuk bawk. Kum upa deuh lam lah Krismas lengkhawm hla tui tak khuangpui leh khuangte nena lo chum chilh tlut tlut lah hriat tur tam narawh. Khawlaiah inla pa tawk a awrawl tawp tawp a au thler duar duar tawk lah an kat nuk bawk. Hei… ha eng pawh ni se kan urlawk zanah hi chuan bengchheng tinrengin kan khawtlang hi a tum vel a ni ber mai. Kum khat chhunga kan lo nghahfak em em krismas urlawk zan a ni miau a, indem tur kan awm lo. Chutiang zawng zawngte chu Masi tihlutu an ni a, a hahdam zawnga kan her thiam chuan mahni kan hahdam dawn a ni.

A hlu em a ni, a nghahhlehawmnate zawng zawng fuan khawmna chu ni 24 zan hi a ni meau a lawm le. Tu emawin engtiang zawng pawnin hleuhvin a huaikawm bawl zawng pawhin lo va khawsa pawh ni se, kan sawi phak a awm lo; an nun a ni miau a, mi nuna va inrawlh loh kha a finthlak an ti tawh zawk a ni lo’m ni tunlaiah…..Mahse, he urlawk zan hi thianghlim tak leh harhfim taka hmang tur erawh chuan kan thalai rualte leh kan fa kan naute hi hrilh a, kawng dik leh tha, Krismas hman dan dik leh pathian lawm zawnga hman dante hrilh fo hi nu leh pa, Kohhran leh thalai hruaitute mawhphurna a ni.
Chuvangin, kan chhungkua, kan kohhran hi mi sawisel leh mi dema kan awm loh nan naupang leh thalai rualte hi ur lawk zan hman dan i hrilh mawlh mawlh ang u hmiang.