Your Daily News

Mobile App ah chhiar theih in a awm e

KABUL-A AMBULANCE-A BOMB PUAKAHH MI 95 THI

0 98

Afghanistan khawpui, Kabul-ah Inrinni khan ambulance khalhtuin a motor khalhah thihchilh bomb a tipuak a, mi 95 thi in midang 158 in hliam an tuar. Kar hmasa khan firfiakten Kabul-a international hotel beiin mi 22 an lo that tawh bawk a ni.

Inrinni chhun dar 12.50 vel khan ambulance khalhtu hian Kabul  khaw laili laia security checkpoint-ah police-te chu damdawi-ina  hruai tur damlo a phurh thu a hrilh a, kaltlang tir a nih hnuah checkpoint pahnihnaah a bomb pai chu a tipuak ta niin interior ministry thupuangtu Nasrat Rahimi chuan a sawi.

Bomb puak vanga thi zinga a tam zawk chu civil mi an ni a, sipai mi leh sa pawh thi zingah hian an tel bawk. He pawikhawihna thleng kaihhnawihah hian rinhlelh thilah mi pali manin, thu zawhfiah mek an nih thu Rahimi chuan a sawi bawk.

Ambulance-a bomb tihpuahna hmun hi Kabul khaw laili lai, interior ministry building awmna bul a ni a, a bul hnaiah hian European Union leh Indian consulate-te an awm bawk. Hei bakah hian sorkar office building pawimawh dangte pawh an awm a ni. Bomb puak hian a bul vela motor eng emaw zat a tichhia a, dawr tam tak a chhe tel bawk. A bul hnaia sorkar damdawiin, Jamhuriat hospital tukverhte pawh kehin a bang pawh a chhe bawk a ni.

Ram hrang hrangte chuan Afghanistan-a pawikhawihna thleng hi an dem thu an sawi. UN Secretary-General Antonio Guterres chuan Kabul-a pawikhawihna rapthlak tak thleng chu a dem thu sawiin, pawisawi lo civil mite beih an ni ṭhin chu ngaihthiam theih a ni lo tih a sawi. Afghanistan-a US ambassador John R Bass pawhin a dem thu sawiin, he thil thleng hi mi dawihzepte thiltih a ni, a ti.  International Committee of the Red Cross chuan pawikhawihna thlenna atana ambulance hman a ni chu thil pawi tak, ngaihdam theih loh thil a ni tiin a sawi.

Taliban firfiak pawl thupuangtu, Zabihullah Majuhid chuan Kabul-a bomb tipuaktu an nih thu a sawi.

credit, vanglaini

Leave A Reply

Your email address will not be published.