Your Daily News

Mobile App ah chhiar theih in a awm e

Afrin biala inbeihna vangin mi tam tak tlanchhia

0 47

Turkey sipaiten Syria ramri, Afrin biala Kurdish firfiak pawla a puan, YPG laka beihpui a thlak avangin he bial aṭang hian mi tam tak chu himna zawngin an tlanchhe tawh.

Kar kalta Inrinni aṭang khan Turkey sipaite chuan Syria hmarthlang lama an inrina, Afrin bialah hian beihpui a thlak ṭan a, thlawhtheihna  hmanga a beih bakah khawmual sipaite pawh a tir tawh bawk.

Beihpui thlak a nih hnu hian Afrin-a cheng mi sang tel chu an tlanchhe tawh a, ṭhenkhat erawh chu Syria ramchhung lama an tlanchhe tur dan an ni thu sawi a ni thung.

United Nations chuan Afrin-a chengte chu chhawmdawlna tur thawn tura a inpeih thu a sawi.  UN chuan inbeihna thleng vang hian Afrin-a cheng civil mi 323,000 vel chu dinhmun hlauhawm takah an awm mek tih a sawi.

Ram hrang hrangte chuan Turkey sipaite chu Syria ramria beihpui an thlak titawp turin an ngen a, Syria ramri-a chengte dinhmun a chhiat phah dawn hle niin an sawi. Mahse Turkey President Recep Tayyip Erdogan chuan People Protection Units (YPG) firfiakte nuaibo tura an beih zel tur thu a sawi. YGP hian Syria hmarlama Turkey nena an inrina, km 400 chuang zet chu an thunun mek a ni.

Syrian Observatory for Human Rights chuan Turkey beihpui thlak vang hian civil mi 24 in an thih phah tawh niin a sawi bawk. Mahse Turkey chuan firfiakte hmun chauh an bitum thu leh, civil mi thi an awm loh thu a sawi thung.

credit, vanglaini

Leave A Reply

Your email address will not be published.