Your Daily News

Mobile App ah chhiar theih in a awm e

CHENNA IN ZAWNG ZAWNG TEN ENG AN NEIHNA TURA SORKAR LAIPUI HMALAKNA CM HAWL-AN A TLANGZARH

0 63

India ram puma chenna in zawng zawngin êng an neih theihna tura sorkar laipui hmalakna thar, Pradhan Mantri Sahaj Bijli Har Ghar Yojana, SAUBHAGYA tia sawi bawk chu nimin khan Synod Conference Centre-ah chief minister Lal Thanhawla’n a tlangzarh. He scheme hi Mizoram district khawpui hrang hrangah tlangzarh a ni bawk.

Chief Minister chuan, hmalakna duhawm leh ṭangkai tak tur Mizorama tlangzarh a ni ta chu lawmawm a tih thu sawiin, “Sorkar laipuiin ram pum tan he hmalakna tihhlawhtlin hun tur a tuk chu March 2019 ni mah se, Mizoramah chuan kumin December ral hma ngeia zo tura ruahman a ni. Mizoram chu ei ṭâwk ṭâwk (subsistence economy) aṭanga market economy-a siamna tur NEDP hlawhtlinna atan kawlphetha ṭha a pawimawh,” a ti.

Sorkarin kawlphethain a thlunzawm loh khua leh in eng emaw zat la awmah ngawrh taka hma a lak a nih thu sawiin CM Hawla chuan, “Chenna in pakhatmah hmaih a nih loh nan a fál deuha awmte pawh nizung chakna hmanga êng pek an nih theih nan ruahmanna siam a ni. Mithiamte’n an chhût danin, Mizoramah hydel power project aṭangin kawlphetha megawatt sang tam tak siam chhuah theih a ni,” a ti a; ram leilung leh boruak a ngawng dan tur ngaihtuah tel zelin a pawi lo tur chinah hmalak a nih tur thu a sawi.

Lal Thanhawla chuan, Mizoram chu India ram puma Gross State Domestic Product (GSDP) sang ber pawl a ni tih sawiin, “NITI Aayog phei chuan kum 2017-18 chhunga Mizoram GSDP-in double digit a kai theih mai an ring. Heng hmasawnna hi state sorkar hmalakna hrang hrang hlawhtlin vang a nih bakah, sorkar hnathawkte thawh ṭhat zar a tih loh theih loh. Vawiina hmalakna thar tlangzarh tak pawh a hlawhtlin ngei theih nan sorkar hnathawkte’n ṭhahnemngaihna an chhawm nun zel a pawimawh,” a ti.

Sorkar hmalakna hrang hrang zarah Mizoramin rei lo têah ṭhenawm state-te aia kawlphetha tam zawk a siam chhuah vat a beisei thu sawiin CM Hawla chuan, “Heng hmalaknate hi a hlawhtlin dawn chuan mipui pawhin inrenchem nacháng kan hriat thar a ṭul. Chu bakah, kawlphetha hi ṭangkai viau mah se, fimkhur nacháng hriat a ṭul a ni,” a ti a; thiam chiang loa electrical wiring kawih ve ringawtin thil pawi zawk a thlen theih thu a sawi.

Chief Minister chuan, Mizoram chu India puma transmission and distribution loss (kawlphetha semchhuah leh pek chhawnnaa hloh) sang ber a ni chu thil lawmawm loh tak a nih thu sawiin, “A chhan tam tak awm thei zingah meter dik lo leh khawihchingpen te, hna thawh ṭhat tâwk loh leh rûkrûk chin vangte a tel thei. Pawi khawih zawnga chêt chu thil tih miah loh tur a ni,” a ti.

Saubhagya hi cheng vbc. 16,320 hû project a ni a, Prime Minister-in September 25, 2017 khan a tlangzarh. Thingtlang mi nuai

400 a tuam dawn a, Mizoram pawhin November 6, 2017 khan sorkar laipuiah Letter of Intent (LoI) a thehlut tawh a, January 2018 chhunga DPR thehluh hman tumin hmalak mek a ni.

He scheme hnuaiah hian chenna in bakah, thlám pawh a huam theih nan hmalak a ni a; sum senso tur chu sorkar laipuiin 85% tumin, 10% chu loan angin pek a ni ang a, a dang 5% chu state sorkarin a tum ve tur a ni. Mizoramin a tum anga December 2018 ral hmaa scheme hi a thawh zawh hman chuan loan chanve chu grant-a kaltir a ni ang.

 

Credit, vanglaini

Leave A Reply

Your email address will not be published.