Your Daily News

Mobile App ah chhiar theih in a awm e

Thingsaiah NLUP-ah vawkte thi sem a ni?

0 83

MNF Group & Vigilance Committee, Thingsai chuan thuchhuah siamin, December 2017-a Thingsai khuaa NLUP hnuaia vawkte thi sem a nih thu an tarlang a; Thingsaia Congress party hruaitute’n NLUP sem leh a kaihhnawihah mipui an pawngsual nia an hriat thu sawiin, sorkarin a rang thei ang berin chingfel se an duh thu an sawi.

Thingsai MNF tarlan danin, December 10, 2017, Pathianni zing karah Thingsaia K Lalhlira in bulah NLUP hnuaia vawk vulh thlangtu mi 25 hnenah vawkte pathum ṭheuh, a vaiin vawkte 75 sem a ni a; vawkte 75 zingah chuan a thi pakhat a tel a, chu chu a chang tur pawh hnuah F Lalsangpuii’n a dawng.

Vawkte sem hmain a dawng turte koh khawm niin, vawkte phurhna motor hman nan Rs. 100 ṭheuh thawh a ngaih thu an hrilh a; December 9, 2017-ah Thingsaia NLUP chairman K Lalhlira pik-up MZ-06 5824 hmangin Tarpho khuaah vawkte chu F Biaka, Hnahthial VFA hnen aṭangin an la chhawng a, an sem ní-ah a dawngtute aṭangin motor hman man Rs. 200 zel an laksak a ni.

MNF, Hnahthial Block-I president Sangzuala’n Hnahthial VFA F  a zawhfiahnaah F Biaka chuan, ‘Hnahthial aṭanga vawkte phurh man chu department leh supplier-in an intum sem thu leh a dawngtute’n phurh man an chawi a ngaih loh thu te, AH&Vety list-a vawkte dawng tur zat chu mi 26 a nih thu te, mi 26-te’n vawkte pathum ṭheuh an chan theih nan leh a thi a awm palh pawha a hnawhkhah nan vawkte 81 an thawn thute a sawi niin an tarlang.

Thingsai MNF chuan, “Vawkte phurh man department leh supplier-in an tum vek si chuan, eng vangin nge a dawngtu hnena Rs. 200 ṭheuh (25×200= 5000) an chawitir tih hi kan zawhna a ni?” an ti a; vawkte 81 thawn a nih laia 75 chiah sem a nih avangin, a bâng vawkte paruk aṭangin K Lalhlira’n vawkte pathum leh an secretary K Lalmuanawma’n pakhat an chang nia an hriat thu an tarlang a ni.

December 10, 2017-a sem vawkte chu an la no deuh avangin a dawngtute’n an dawn hnuah thi a awm nual nia sawiin Thingsai MNF chuan, “Thla khat a ral hma, January 10, 2018 thleng khan NLUP vawkte sem zinga 20 chu an thi tawh a ni,” an ti. An thuchhuahah hian vawkte dawngtu leh an dawn hnua thi tawh zat leh a neitute hming an tarlang nghal bawk.

Thingsai MNF chuan, December 18, 2017 khan khawtlang aurinna hmangin, ‘December 19, 2017-ah NLUP 3rd & 4th phase serthlum thlangtu zawng zawngte K Lalhlira inah Krismas pocket money sem tur a awm a, kalkhawm tur a ni e,’ tih puan a nih thu sawiin, “Hemi tuma NLUP sum semah pawh hian mipui rawkna a thleng ngei niin kan ngai. Sorkar hian chhui chiangin, mipui rawktute hi hrem se, an sum laksak hi pe let ngei se kan duh,” an ti.

An tarlan danin, pawisa sem tur chu December 18, 2017-ah K Lalhlira pik-up MZ-06 5824 hmangin Khawhri-a Hnahthial Horticulture department-a thawk Pu Dina hnen aṭangin Thingsaia NLUP chairman leh secretary ten an la a, December 19-ah K Lalhlira inah an sem a ni.

Sum sem dawnah Chairman leh Secretary-te chuan, an sum lak chu Khawhri-ah a zat an chhiar hman lo a, Thingsai an thlen hnuah an chhiar a, mi pakhat chan-ai ang vel a kim lo niin an sawi. Chutih laiin, Pu Dina chuan, pawisa chu a kut aṭanga an ken chhuah hmain an inah a nupui leh a latute’n an chhiar vek thu leh a dawngtu zat milin an chheh hran nghal vek thu a sawi thung.

 

credit, vanglaini

Leave A Reply

Your email address will not be published.