Your Daily News

Mobile App ah chhiar theih in a awm e

Juventus-in semifinal an lut

0 103
Juventus-in semifinal an lut

Coppa Italia champion lai Juventus chuan an nomawi kawl lai humhim turin kawng dik an zawh zel. Nilaini zan khan Turin club pahnih Juventus leh Torino ten quarterfinal an khel a, Juve hian Mario Mandzukic leh Douglas Costa te goal hmangin 2-0 in hnehna an chang.

Juventus hian final lut tur chuan Atalanta an paltlang leh a ngai dawn a, Atalanta hian Serie A hmahruaitu Napoli chu 2-1 a an pet chhuah theih avangin Juve hna hi a awlsam dawn lo. Semifinal lehlamah Lazio leh AC Milan te an intawng ve thung ang.

Coppa Italia semifinal hi home leh away-ah khelh tur a ni dawn a, champion team hian Europa League an khelh nghal theih avangin European football khelh theihna remchang a ni nghal.

Juve manager Massimiliano Allegri chuan, “A zawnin kum li chhung semifinal kan lut ta a, ka naute hun pawimawhah tak an chet ṭhat avangin a thiam pali zingah kan tel. Kan khingpui leh tur Atalanta hi team ṭha an ni tih chu kan hria, inkhel hautak hmachhawn turin kan inpeih a ni,” tiin a sawi.

Juventus goal hnihna luh danah Torino lam an lawm lo, goal a luh hma hian Sami Khedira chu Afriyie Acquah lakah a foul ngei niin a lang a, Torino hian an beisei ang free kick an hmuh loh laiin an lamah a lut zui bawk, coach Sinisa Mihajlovic chu referee thutlukna a duh loh zia a lantir nasat avangin hnawh chhuah a ni.

Torino assistant manager Attilio Lombardo chuan, “Thutlukna dik lo kan tuar, kan phu ang taka freekick pek kan ni lo kha kan tuar a ni, goal hnihna khan inkhel a ti tawp vek,” a ti. Atalanta hian kum 1963 hnuah Coppa Italia nomawi an la chawi leh lo a, an khingpui Juventus erawh tun hnaiah ringawt pawh a zawnin vawi thum an champion thei.

Leave A Reply

Your email address will not be published.

This site uses Akismet to reduce spam. Learn how your comment data is processed.

WP Facebook Auto Publish Powered By : XYZScripts.com