Your Daily News

Mobile App ah chhiar theih in a awm e

CHINA-IN UN RESOLUTION BAWHCHHIAIN NORTH KOREA HNENAH OIL A HRALH: “CAUGHT RED HANDED…”- President Donald Trump

0 97

CHINA-IN UN RESOLUTION BAWHCHHIAIN NORTH KOREA HNENAH OIL A HRALH: “CAUGHT RED HANDED…”- President Donald Trump

December 30, 2017 (MSR): China chuan UN Security Council Resolution 2375 a siam tak, Sept thla ami leh November thlaa khauh zawka siam Resolution 2397 bawhchhiain, a rukin North Korea hnenah tuialhthei (oil) a lo hralh ru leh pek a! Hetianga China thiltih hi US President Donald Trump chuan “A va luhai thlakin buai thlak tak em! An inhlan chhawng lai ngei man (caught RED HANDED) a ni. Hetiang anih zel chuan engtinnge North Korea buaina chu kan chin fel theih ang le?” a ti.

A ruka North Korea hnena oil hralhtu phurtu lawng (vessel/oil tanker) hian Hong Hong chhinchhiahna (flagged vessels) a ni a, a hmingah “Lighthouse Winmore” tih a ni. Nov 24 khan South Korea chhim lam Yeosu hmunah ship-to-ship in oil phurh te an lo inpe chhawng a, oil hi 600 tons zet niin North Korea ram thlen hma deuh, international waters ah man a ni.

Nov 14 khan Taiwan tuipui atangin South Korea a pan a, he oil tanker hi Billion Bunker Group ta niin, Ajeltake, Marshall Islands a register a ni thung. He lawng hian Japanese refined oil chu Oct 11 khan a phur a, Taiwan phurh thlen tura ngaih a nih laiin, North Korea a pan ta daih a! Chutah North Korean lawng “Sam Jong-2” oil tanker kum 1975 a sak leh lawng (vessels) dang 3 te hnenah a oil phurh chu ava hlan chhawng ta a ni.

Lighthouse Winmore lawnga thawktu Chinese mi 23 leh Myanmarese 2 telin, South Korea ah hren mek an ni a; investigation tih zawhah chhuah an ni ang. UN Resolution 2397 khan North Korea hremna khauh zawk, 90% a oil chawk luh hrek sakna tur a siam a, UN member ramten a tul angin NKorea lawngte chu “man sak, endik, hren sak” phal a ni ang tih a ni a. Chung hming langa tarlan zingah Sam Jong-2 North Korea oil tanker leh lawng dang 4 hi a tel a ni.

Tun hnaiah US Treasury Dept chuan North Korea lawng 22 leh Shipping & Trading Companies 6 chu hrek turin a ti thar bawk.

US Spy Satellite te chuan van lam atangin Korean Peninsula chu a thlir ngunin, China lawngten NKorea hnena oil an hralh ru tur hi a lo hmu a ni. China lawng West Sea lama che tla vel pawh thla 3 chhungin vawi 30 zet chu a hmu a, thenkhat chuan oil hi an va hralh ru vek bik lo. US puhna hi Ren Quafeng, Chinese Defense ministry chuan a pha nasa hle.

RUSSIA-IN NORTH KOREA BEIH A DUH LO

Russia chuan US in North Korea chu military chakna hmanga beih (attack) a tum tlat ni a hriain, pumpelh se a duh hle a. Oleg Burmistrov, Russian Ambassador at Large chuan, “North Korea beihna chuan military chakna hmanga inbeihna chauh ni lovin, nuclear war tichhuak thei a ni dawn a, indona a chhuah vaih chuan chhiatna rapthlak namenlo (catastrophe) a thleng ngei ang. North Korea hi miliary chakna hmanga chin fel (resolve) chi a ni lo. US official te hian sipai chakna (military chakna) hman chu tihtur hmasa a ni lo (not priority) an tih reng laiin, sipai chakna hman theih dan tur an ngaihtuah tel tlat a ni. Military a buaina (conflict) a chhuah palh chuan kan buai pherh nasa khawp ang” a ti.

US Defense Secy Gen. James Mattis chuan Guantanamo Bay (Cuba) a Naval base a tlawh tumin, “Diplomatic a hlawh chham vaih chuan, indonaa kal turin inbuatsaih nghal rawh u. Kan che a nih ngai chuan North Korea nun phung chu kan tichhe vek ang tih kan beisei (expect) tur a ni” tiin, fuihna thu a lo sawi tawh a ni.

US Navy te chuan North Korea missile te chu F-35 Stealth fighters ten van boruakah an lo kap darh thei turin an ngai a, mahse, hei hi thil hlauhawm tak fimkhur ngai bawk si ni turah an chhut. Terminal High Altitude Area Defense (THAAD) system chuan NKorean ICBM missiles te chu van boruakah kapthla thei turin an ngai bawk. THAAD hi Alaska ah Inter-Continental Ballistic Missile (ICBM) lo kapthla thei turin bun an ni tawh a, Pacific Ocean tuifinriat atanga missile kah chhuah chu enchhinin a hlawhtling thawkhat na in, 100% erawh a ni lo.

US chuan Ground-based Midcourse Defense (GMD) system hi May thla khan an enchhin a, mel 4200 atanga ICBM missile lo thlawk vawn vawn chu van boruakah a lo kapdarh a, mahse, 55% chauh a hlawhtling niin The Atlantic chanchinbu chuan a sawi.

Hetih lai hian US leh EU ram te chuan Russia chu Ukraine chungchanga a inrawlh nasat avangi thla 6 dang an hrem chhun zawm zel a, US President Trump pawhin US hremna bik tur executive order ah a hming a ziak ta bawk. Ukraine President Petro Poroshenko chuan US-EU ram hruaitute chu an thutlukna vangin a fak hle.

Russia chuan hetianga US hrem chhunzawmna hi a lawm lova, mit aiah mit, ha aiah ha (tit for tat) tiin, hremna thungrulh nan US nena kum 1992 a Treaty on Open Skies an lo neih chu nam nulin patrol flights te khuahkhirhna tur siam a tum. Chutiang a lo nih chuan “unarmed flights, reconnaissance jets” hote chu an fimkhur zual a ngai hle tawh dawn a ni@CT Lalrinawma

Leave A Reply

Your email address will not be published.

This site uses Akismet to reduce spam. Learn how your comment data is processed.

WP Facebook Auto Publish Powered By : XYZScripts.com