Your Daily News

Mobile App ah chhiar theih in a awm e

Krismas puala thisen pe an pung

0 66

Aizawla blood bank pahnihte leh Association for Voluntary Blood Donation (AVBD)-te’n Aizawl Civil Hospital leh Synod Hospital blood bank-a Krismas puala thisen pek hun an huaihawt chu kalpui mek a ni a; mi ṭhahnem takin thisen pe tawhin, kum hmasa lama Krismas puala thisen pe aiin kuminah pe an tam zawk.

Thu dawn danin, Blood Donation for Christmas puala thisen pe hi nimin thleng khan Aizawl Civil Hospital blood bank-ah chuan mi 100 chuang an ni tawh a, Synod Hospital blood bank-ah erawh chuan mi 10 an ni.

AVBD chuan, Blood Donation for Christmas an huaihawt mek chu December thla chhung zawng neih tur a nih thu sawiin, pek ní bik awm chuang loin, Aizawl Civil Hospital leh Synod Hospital blood bank inhawn ni-ah pek theih a nih thu an sawi a; Mizo ṭhalaite chu Krismas thilpek atana thisen pe turin an ngen nawn leh a ni.

AVBD hruaitute chuan, Krismas bâwr vel leh kum thar tìr lamah thisen pe an tam lo a, pawl hrang hrangin thisen an pek loh hun lai a nih avangin blood bank-ah thisen neih sa a tlem lai a ni ṭhin tih an sawi a, “Kum danga Krismas báwr vela thisen unit 500 velte pe ṭhin Kohhran Thianghlimte’n an biak-in, Solomona Temple an hawn dawn avangin kuminah an pe dawn lo a, hei vang hian kumin Krismas leh kum thar tìr lamah blood bank lamte’n thisen an neih tlem lehzual a hlauhthawnawm hle a ni,” an ti.

Blood bank aṭanga thu dawn danin, kumin chhung, January aṭanga nimin thleng khan Aizawl Civil Hospital tan mi 13,084-in thisen an pe tawh a; Synod Hospital tan mi 3,277-in an pe tawh bawk.

credit,vanglaini

Leave A Reply

Your email address will not be published.