Your Daily News

Mobile App ah chhiar theih in a awm e

Dan leh thupek kenkawh kawngah Theihtawp kan chhuah – Aizawl SP

0 113

Aizawl SP Neihchungnunga chuan, Krismas leh kum thar vuakvêtah mipui an him a, thlamuang taka hun an hman theih nan dan leh thupek kenkawh kawngah theihtawp an chhuah thu a sawi.

Vanglaini palai zawhna chhangin Neihchungnunga chuan, Police-te’n mi man an tum ngawr ngawr lo tih sawiin, “Mipui himna atan dan leh thupek kenkawh kawngah theihtawp kan chhuah zel dawn a, tumah man ngaiin awm lo se tih hi keini lam pawhin kan duh dan a ni. Mipuite’n Krismas leh kum thar lawmna hi hlim takin hmang se kan duh,” a ti.

Aizawl SP sawi danin, hun eng emaw chen aṭang tawhin police-te’n khualzin phur lirthei khalhtute chu an ruih leh ruih loh Kulikawn, Bawngkawn leh Hunthar Venga Company Pêngahte an endik ṭhin. December 11, 2017 aṭang khan Aizawl khawpui dáiah zan lamah mobile patrolling neih ṭhin a ni a, dan leh thupek zâwm lo an vai a ni.

Police station tinte chu an remchan dan angin, zan reiah dan bawhchhia leh rûi chunga lirthei khalh an awm leh awm loh endik tur tih an ni a, a remchan danin an endik zel dawn.

Aizawl Police Station staff-te chuan December 19, Thawhlehni zan khan lirthei khalhtute endik hna an thawk a, mi 93 manin, an zinga 17 chu rûi chunga lirthei khalh an ni.

Dan bawhchhiaa lirthei khalhte chu MVI Act hmanga hrem an ni a, rûi chunga lirthei khalhte pawh danin a phût anga hrem an ni. Thawhlehni zana Aizawl PS-te’n an mante pawisa chawi tling khawm chu Rs. 57,400 a ni.

Aizawl district police-te chuan vawiin aṭang hian Ch.Saprawnga Truck Terminal, Rangvamualah temporary beat post an siam dawn a, sub-inspector (SI) hoin duty dah a nih dawn bakah, prison van chhawp a ni ang.

Aizawl SP chuan, sorkar phal loh silai lem, a mu kâp chhuak thei eng emaw zat an man tawh thu sawiin, “Vawiin thlengin hâlpuah leh hâlmawi chu man tur kan la hmu lo,” a ti.

credit,vanglaini

Leave A Reply

Your email address will not be published.