Your Daily News

Mobile App ah chhiar theih in a awm e

City chhanhimtu keeper Bravo

0 71
City chhanhimtu keeper Bravo

Manchester City-in Carabao Cup-ah Leicester City hneh turin goalkeeper Claudio Bravo ṭanpuina an mamawh a, hun pangngaia 1-1 a an inhnehtawk hnuah penalty shootout-ah 4-3 in an chak a, semifinal an thleng.

Thawhlehni  zan inkhelah Pep Guardiola-a’n reserve team a luhtir a ni ber a, hnehna an chan tho avangin inelna pali Champions League, Premier League, FA Cup leh League Cup-ah an la champion thei vek.

Reserve team?

City boss Pep-a’n krismas vuakvetah match khelh tur a tam tih hre chungin Tottenham Hotspurs an hneh ṭuma bul ṭantu aṭangin player pahnih Eliaquim Mangala leh Ilkay Gundogan te chiah bul a ṭan nawn tir a.

An squad a chhah miau avangin reserve team anga chhiar theihah pawh keeper Bravo, Danilo, Yaya Toure, Bernardo Silva leh Gabriel Jesus te an la awm thei a. Rawlthar duhawm zingah kumin FIFA Under 17-a golden ball dawngtu Phil Foden a tel bawk.

Leicester City lam pawhin Crystal Palace an hneh loh ṭuma starting eleven chang zingah player pathum chauh an hmang nawn a, manager Claude Puel chuan hman theih turin Jamie Vardy, Riyad Mahrez leh Demarai Gray te chu mamawh dan a zira chhawr theih turin bench-ah a dah thung.

City mil zelin

Pep Guardiola-a’n khelh duh dan a nei a, an khingpuite chuan hemi mil hian game plan an siam ṭhin. King Power Stadium-ah pawh mualneituin goal venhim tumin bul an ṭan nghal a, chutichung chuan City-in Foxes tlarhnung an ṭhiat thei a, Gundogan ball pek fing tak chu Bernardo Silva-a’n goal-ah a chantir nghal a, Portuguese midfielder-in hun thawl a neih theih nan Jesus-a’n defender a hruai peng nalh viau bawk.

Leicester-in knockout inelna kalhmang an hriat chian avangin goal an chhuah hnuah an huai sawt a, amaherawhchu City aṭanga an lakluh Kelechi Iheanacho-a’n beisei a pha lo chhunzawm zel. Claude Puel-a’n second half-ah Vardy, Mahrez leh Gray te luhtirin an goal nawr a na sawt.

Injury time-ah minute riat zet pek belh a ni a, minute ruknaah Mangala inhliam vanga rawn lut Walker-a’n substitute Gray a tihtluk avangin penalty a chawi a, Vardy-a’n siphurh sut nan a hmang. Foxes an vannei a, hun pangngaiah an inhnehtawk.

Extra time-ah City-in goal chance ngah zawk mah se Vardy tlan chakna chu mikhual tan buaina tham a ni a, minute 126-naah English striker hi box chhungah yellow card hmu tawh Danilo-a’n a titlu nachungin referee Robert Madley-a’n penalty a pe nawn tawh lo.

Chhandamtu Bravo

Barcelona aṭanga City zawmtu keeper Bravo hi Brazilian keeper Ederson-a’n khelhna hmun luahlan mah se penalty-ah erawh sulhnu a nei ṭha chhunzawm zel.  Bravo hian season ṭan hmain Chile-in FIFA Confederations Cup final an thlen theih nan Portugal player-te penalty pet a dan sak vek a, League Cup-ah pawh hian quarterfinal an thlen theih nan Wolverhampton Wanderers penalty pet vawi hnih a dang tawh bawk.

Foxes player zingah  Harry Maguire chiahin Bravo hi a bum a, Chilean keeper hian Christian Fuchs leh Vicente Iborra te petna lam a ring dik a, Vardy penalty pet ring dik lehin English striker hian goal ban hrulin a pet out a, hnehna an chan theih nan Mahrez-a pet a dang leh bawk.

City tan Bravo chu chhandamtu a ni a, an aiawha penalty pettu Gundogan, Yaya Toure, Lukas Nmecha leh Jesus ten an khung vek bawk.

Quadruple?

Manchester City chairman Khaldoon Al Mubarak chuan May thla khan ‘quadruple champion’ chu an tum zinga mi a nih thu a sawi a, amaherawhchu Spanish manager erawhin he ngaihdan hi a ṭawmpui lo.

Hemi chungchanga zawhna chu Pep chuan, “Theihngilh rawh u, a thleng dawn lo,” tiin a chang. Spanish manager chuan player naupang hmang chunga hnehna an chan avangin a lawm tih a sawi tel bawk.

Nizan khan quarterfinal match hnuhnung pahnih khelh a ni a, he inkhel zawhah hian semifinal inhmachhawn tur pawh nghal tur a ni. Semifinal hi double leg-in home leh away a khelh tur a ni a, January thlaah final khel tur zawnna hi neih a ni ang. City leh Arsenal-in semifinal an lut tawh a, Manchester United leh Chelsea ten an hnung an rawn zui a nih chuan ‘Dream Semifinal’ ang hiala chhiar theih a ni ang.

credit,vanglaini

Leave A Reply

Your email address will not be published.