Your Daily News

Mobile App ah chhiar theih in a awm e

US-in UNSC draft resolution a veto hmangin hnawl

0 94
US-in UNSC draft resolution a veto hmangin hnawl

United Nations Security Council-in US President Donald Trump-an Israel khawpui atana Jerusalem a pawm thu a puan leh, America embassy awmna hmun sawn a tumna hnawlna tur, draft resolution a siam chu US chuan a veto power hmangin a hnawl.

UNSC draft resolution hi Thawhṭanni khan pharh a ni a, Security Council  member dang 14 chuan an thlawp a ni. Mahse member dangten thlawp mah se, US chuan a thuneihna hmangin a hnawlsak.

UN-a US ambassador Nikki Haley-i chuan, “Mi ṭhenkhat tan lungawi lohna ni mah se, US chuan thudik tak awmsa chu pawm turin huaisena leh rinawmna a nei a ni”,  a ti. Jerusalem chu Juda-te tan kum sang tel politics, culture leh sakhaw lamah pawh an khawpui a ni tawh a, hei lo chu khawpui dang an nei lo a ni, a ti. US chuan a embassy a dah duh leh duh loh chungchangah leh, a dahna hmun turah te thuneihna a nei a ni tiin, hemi chungchanga vote lak a ni chu inhmusitna, an theihnghilh mai tawh loh tur a nih thu a sawi.

UNSC-ah hian permament member panga – US, UK, France, Russia leh China an awm a, permanent member-te hian veto power neiin an power hmang hian resolution siamte an lo dang thei a ni.

Jerusalem chungchanga draft resolution siam hi Egypt duan a ni a, Jerusalem khawpui nihna leh dinhmun tihdanglam tumna chu dan kalh a ni a, hei vang hian hemi chungchang thuchhuah lo siam tawhte pawh Security Council resolution in a duhdan anga sut leh turin a ti a ni. Resolution-ah hian US chu a hminghmerha tarlan ni lo mah se, Jerusalem dinhmun chungchangah tunhnaia thutlukna siam danglam a ni chu pawi an tih thu an tarlang bawk.

France ambassador Francois Delattre chuan an ram pawhin US thutlukna siam hi an thlawp lo tih a sawi a, UNSC draft resolution siam chuan Jerusalem chungchanga ramdangte ngaihdan pawh a in an tlan zia a lang a ni, a ti.

US President Donald Trump-an Israel khawpuia Jerusalem a pawm thu a puan hnu hian hmun hrang hrangah Palestinian leh Muslim-ten lungawi lohna an lantir a ni. West Bank, East Jerusalem leh Gaza Strip-a lungawi lohna lantirnaa buaina chhuakah mi pakua an thi a, midang 1,900 chuangin hliam an tuar a ni.

Palestinian Authority (PA) foreign minister Riyad al-Maliki chuan US in resolution a hnawl chu an lawm lo hle tih sawiin, UN General Assembly-ah resolution hi pass a nih ngei theih nan an bei leh dawn tih a sawi a, “General Assembly-ah draft resolution ngai bawk hi pass turin kan ngen leh dawn a, hemi hunah chuan US hian hetiang thuneihna hi a hmang thei tawh dawn lo a ni”, a ti.

US hian kum 1970 chho aṭang khan a veto hi hmang ṭanin, Israel in Palestinian ram a luahsak chungchanga Security Council resolution 42 zet a veto hmang hian a lo hnawlsak tawh a ni.

Credit, vanglaini

Leave A Reply

Your email address will not be published.

This site uses Akismet to reduce spam. Learn how your comment data is processed.

WP Facebook Auto Publish Powered By : XYZScripts.com