Your Daily News

Mobile App ah chhiar theih in a awm e

Ruihhlo do dan tur ngaihtuahin MLA & CYMA-te’n Chief Minister kawm

0 52

Mizoram Assembly Subject Committee-I member-te leh Central YMA hruaitute chu nimin khan chief minister Lal Thanhawla hoin a pisaah an ṭhukhawm a; tunlaia Mizoram chhung, a bikin Aizawl khawpuiah ruihhlo a tam thar leh vanga harsatna awm mek chungchang leh ruihhlo do kawnga hmalak dan tur an sawiho.

Subject Committee-I member-te leh CYMA  hruaitute hian Chief Minister hnenah hian, ruihhlo hluar zel tur dona atana hmalakna hman­hmawhthlak deuha ngaih leh bawhzui nghal ngai nia an hriatte an thlen.

Rawtna an siam dan chuan, Aizawl chhehvela ruihhlo zuar tamna hmunah dan leh thupek kengkawhtute’n rang zawka hna an thawh theih nan hmun remchang lai zawn ni se, chutah chuan Beat Post siam ni se, tih a ni.

Tun hnaia zir chiannain ruihlo ngai inchiu ṭhinte zingah HIV/AIDS vei an pung thar tih hmuh chhuah chu ram páwn aṭanga ṭanpuina kaltlanga inchiuna hmanrua a thlawna lak theih ṭhin tihtawp a nih tak vangte leh heroin man a tlàwm tak vangah Subject Committee-I leh CYMA chuan an ngai a; inchiuna hmanruate a thlawn lak tur ruahman dan tur rawtna CM hnenah hian an thlen nghal.

CYMA hruaitute leh Subject Committee-I member-te chuan, Chief Minister hi Ministry of External Affairs hnenah Myanmar ram an tlawh theihna tur remchanna kawng zawnpui turin an ngen a; Myanmar an tlawh theih chuan, Myanmar-a Mizo tlawmngai pawlte thawhpui a, Myanmar aṭanga ruihhlo rawn tawlh luh tihtawp dan kawng hmuh chhuah an inbeisei thu an sawi.

Chief Minister hmuhnaah hian Subject Committee-I hi an chairman PC Zoram Sangliana’n a ho a, member zingah Lt. Col. ZS Zuala, John Siamkunga, T Sangkunga, Nihar Kanti Chakma leh Lalruatkima te an tel.

Central YMA hruaitute hi president Vanlalruata, vice  presi­dent R Lalngheta, treasurer Lalro­chuanga, assistant secretary Peter Chhakchhuak leh finance secre­tary Fabian Lalfakawma-te an ni.

Leave A Reply

Your email address will not be published.