Your Daily News

Mobile App ah chhiar theih in a awm e

RINGTU SUAL-A A TLÛK CHHAN

0 106
  • RINGTU SUAL-A A TLÛK CHHAN

By; Challianthanga

1. Ringtu rilruah thlêmna a lo kal a, chutih lai chuan Thlarau Thianghlim chuan tisual lo tûrin a rawn hriattîr a, mahse, a rilru chuan sual lam a awn luih tlat avângin a lo tlu ta țhin a ni.

2. Ringtu chuan thil sual ti tûra thlêmna a tawh laiin, Thlarau Thianghlim chuan, “sual lakah fîmkhur la, Krista lam chu en rawh,” a ti a, mahse, Krista chu en lo va, en loh tûr zawk chu a en țhin avângin a lo tlu țhin a ni. (Davida’n Bethsebi inbual a en lai khân Lalpa lam en zawk tûra hriattîrna a chhûng lamah a dawn ngei ka ring)

3. Ringtu chuan a rilruah tisual tûra thlêmna a tawh laiin Thlarau Thianghlim chuan sual a hnai tih a hriattîr a, țawngțaia inveng tûrin a fuih a, mahse, țawngțaia a inven loh avângin a lo tlu ta țhin a ni.

4. Ringtu chu tisa châkna sualin a beihin Thlarau Thianghlim chuan tisa châkna sual chu puitlin lo tûrin rang takin a chhûng lam chhia leh țha hriatnah a hriattîr nghal a. Mahse, Thlarau Thianghlim hriattîrna chu chiang taka a hre chungin a rilru chuan a tisa châkna lam chu a awn tlat avângin tisa châkna sual puitlin châk et etna chu a rawn tho chhuak ta chiam a, tichuan a tlu țhin a ni.

5. Ringtu chu, thatchhiatna leh inthlahdahna sual chi hrang hrang, “Heng inkhawm peih lohna, Bible chhiar peih lohna, țawngțai peih lohna sualah, tih tûr tih peih lohna sualah (tih loh sualah),” hian a tlu hmasa phawt a. Chu mi hnuah ‘tihsual’ a lo chințhan tawh sualah chuan a tlu leh țhin a ni.

Ringtu suala a tlûk leh țhinna chhanah hian sawi tûr tam a awm thei ang a. Khing ka han tarlan Point nga ațanga kan hmuh chu, “Ringtu a tlûk leh țhinna chhan ber chu, Thlarau Thianghlimin inveng a, fîmkhur-a țawngțai tûra a hriattîrna a zawm loh vâng a ni zêl țhin.” Tih hi a ni.

Aw Zoram, i thil tihsual avângin i rina i hloh thei tih hriain Krismas lo thleng tûrah hian thlêmtu tân kawng hawng lo la, fîmkhur la, inveng la, Krista en la, Krista tân i thinlung hawngin Lal thar chu chibai bûk la, chhandamin awm ang che aw..!!!

Leave A Reply

Your email address will not be published.

This site uses Akismet to reduce spam. Learn how your comment data is processed.

WP Facebook Auto Publish Powered By : XYZScripts.com